Handasporið eftir ommu - Røða hildin á Mentanardøgum í Fuglafirði 30.08.18
![Handasporið eftir ommu - Røða hildin á Mentanardøgum í Fuglafirði 30.08.18](https://landsstyri.cdn.fo/savn/11190/3-mentan-fuglafjørður.jpg?width=1024&height=576&rxy=0.48221664428710936,0.1711111111111111&rmode=crop&t=725&s=ppfnOW0AMy8plKgOZ_OzjcgfvDE)
Í hesum døgum eru mentanardagar í Fuglafirði undir yvirskriftini "Spor".
Rigmor Dam, landsstýriskvinna í mentamálum, setti mentanardagarnar hósdagin 30.08.18. Eisini handaði hon vinnarunum av teknikappingini, sum Fuglafjarðar Bókasavn hevði útskrivað til høvið, vinningarnar.
Vinnararnir í skúlaaldri vóru Henny Vík og Lilja Lassaberg, og undir skúlaaldri vann Lisa José Dos Santos. Fyri heiðursmynd sína vann Sofía Øregaard.
Setanarrøðan hjá landsstýrikvinnuni var eisini spunnin um evnið Spor:
Í teirri smølu smoguni, sum leiðir gongufólk millum Rættará og Skálatrøð í Havn, er ein so vøkur hvítkálkað grund. Um tú veist, hvar tú skalt leita, hómar tú innanfyri hvíta kálkið eina lítla barnahond – í barnahædd – sum er trýst inn í betongið.
Omma mín vaks upp í umhvørvinum á Skálatrøð í Havn, og her hava vit báðar stigið mangt sporið – peikandi og prátandi.
Eg við míni lítlu barnahond í hennara rukkutu, bleytu.
Einaferð, tá vit báðar fóru oman á Skálatrøð ígjøgum smølu smoguna, peikaði hon mær á hetta avtrykkið av tí lítlu barnahondini, sum sást í sementinum innanfyri hvíta kálkið.