Sendistova Føroya í London

Sendistova Føroya í London hevur sum uppgávu at virka Føroyum til frama í Bretlandi (UK) og Lýðveldi Írlands. Sendikvinnan er formliga umboðið fyri landsstýrið mótvegis bretskum myndugleikum og øðrum londum og stovnum við umboðan í London, og er umboð Føroya til International Maritime Organization (IMO). Sum partur av uttanríkistænastuni, og í samstarvi við onnur stjórnarráð og stovnar í Føroyum røkir Sendistovan sambond við avvarðandi myndugleikar í UK um tað formliga sínámillum samstarvið millum Føroyar og UK á handilsøkinum, og somuleiðis í fiskivinnu- og granskingarmálum.

Sendistovan fylgir við málum í UK, ið hava ella kunnu hava týdning fyri Føroyar. Ein natúrligur partur av virkseminum er at gera Føroyar sjónligari í bretskum høpi, og at vísa á, hvat Føroyar hava at bjóða bæði viðvíkjandi høvuðsvinnuni, og eisini á øllum øðrum økjum, sum gera Føroyar eitt áhugavert land at samstarva við. Føroyar eru eitt av næstu grannalondunum hjá UK við nógvum málum av felags áhuga fyri búskapar- og samfelagsmenning.

Sendistovan veitir fegin einstaklingum og feløgum kunning og ráð um viðurskifti millum Føroyar og UK, umframt at hjálpa føroyingum á staðnum við málum av praktiskum týdningi eftir tørvi.

Meira kunning um viðurskiftini Føroya við Bretland er at finna her.

Til ber at fylgja sendistovuni á Facebook og Twitter (@FaroesinLondon)

Adressa og samband:
Representation of the Faroe Islands
55 Sloane Street
London SW1 9SR
T-post: london@mfa.fo

Sendistovan er staðsett í danska ambassadubygninginum, her (í google maps).