KUNNINGARFERÐ Í ÍSLANDI UM SKÚLATILBOÐ TIL UNG VIÐ SERLIGUM TØRVI
![KUNNINGARFERÐ Í ÍSLANDI UM SKÚLATILBOÐ TIL UNG VIÐ SERLIGUM TØRVI](https://landsstyri.cdn.fo/savn/1893/klettaskóli-tækniskólinn-m-færeyingum-018.jpg?width=1024&height=576&rmode=crop&s=hzdnQdnyYFrll0XMwhcNYk9wHOg)
Í døgunum frá mikudegnum 28. august til 30. august hevur Bjørn Kalsø, landsstýrismaður í mentamálum, verið á vitjan hjá nýtilnevnda starvsbróðuri sínum í Íslandi Illuga Gunnarsson.
Á ferðini kunnaði landsstýrismaðurin í mentamálum seg serliga um, hvussu íslendingar hava skipað síni tilboð til næmingar við serligum avbjóðingum við serligum atliti at inklusjón í vanligar skúlar og miðnámsskúlar.
Á ferðini varð vitjað á serskúla og á vanligum skúlum, miðnámsskúlum og stovnum, sum arbeiða við greining og menning av næmingum av hesum slag.
Bjørn Kalsø, landsstýrismaður, sigur, at sambært ST-sáttmálanum um rættindi hjá teimum, sum bera brek, og sum vit hava bundið okkum til, hava øll ungfólk óansæð førleikar rætt til skúlatilboð. Vit hava skúlatilboð á Rásini og í summar byrjaði ein serflokkur í Hoydølum, sum er tann fyrsti av sínum slagi í Føroyum. Men um vit skulu liva upp til ST- sáttmálan verður neyðugt at skipa enn fleiri serliga tilrættaløgd skúlatilboð til ung við serligum avbjóðingum. Ferðin til Íslands er liður í hesum arbeiði.
Við á ferðini hava verið embætisfólk úr Mentamálaráðnum, umboð fyri Almannaverkið og stovnar og skúlar, sum arbeiða við næmingum við serligum avbjóðingum í Føroyum. Umboð fyri Javna og MBF vóru eisini við á ferðini.