![Guðrið E. Johansen rektari í Miðnámsskúlanum í Suðuroy](https://landsstyri.cdn.fo/savn/11673/mynd-guðrið.jpg?width=1024&height=576&rmode=crop&s=9jH2jPGq8fAGR8vPvVsEiul7Z8k)
Rigmor Dam, landsstýriskvinna í mentamálum, hevur gjørt av at seta Guðrið E. Johansen í starvið sum rektari í Miðnámsskúlanum í Suðuroy frá 1. februar 2019 at rokna.
Guðrið E. Johansen er 43 ára gomul og er cand.scient. í geofysik frá Københavns Universitet í 2004. Harumframt hevur hon lisið geografi sum hjáfak og tikið námsfrøðiliga útbúgving til miðnámsskúla í alisfrøði og geografi (pedagogikum). Í løtuni er hon eisini í gongd við at lesa hjánám í støddfrøði á Fróðskaparsetur Føroya.
Guðrið E. Johansen hevur arbeitt sum studentaskúlalærari í gott 10 ár eitt nú bæði í Norra, Grønlandi og Føroyum.
Seinastu árini hevur Guðrið E. Johansen starvast í Miðnámsskúlanum í Suðuroy sum lærari, umframt at hon hevur røkt ávísar umsitingarligar uppgávur har í 2 ár.
Mentamálaráðið ynskir Guðrið E. Johansen hjartaliga til lukku og blíðan byr í starvinum.