![FØRLEIKAMETING OG FØRLEIKAMENNING](https://landsstyri.cdn.fo/savn/4325/2fbdeb8c-5589-4659-b565-6d8f89aa08fb.jpg?width=1024&height=576&rmode=crop&s=gux2RX50cbAwhIEgR9Gp7Kg4dkg)
Bjørn Kalsø, landsstýrismaður í mentamálum, hevur fingið handað tilmæli um førleikameting og førleikamenning í Føroyum, frá arbeiðsbólki mannaðan av umboðum frá Menta-, Vinnu- og Heilsumálaráðnum, Yrkisdeplinum, Arbeiðsloysisskipanini, Vinnuhúsinum, fakfeløgum og trimum yrkisskúlum.
Yvirskipaða endamálið við tilmælinum er at geva politisku skipanini innlit í, hvussu ein skipan við førleikameting og førleikamenning kann setast í verk í Føroyum.
Førleikameting snýr seg um at orða, skjalfesta (dokumentera) og viðurkenna førleikar, sum borgari hevur.
Førleikamenning er við støði í førleikametingini at gera ætlan fyri menning, sum viðkomandi kann fara undir.
Endamálið við førleikameting er at geva ófaklærdum, møguleika at fáa mett sínar fakligu førleikar, ið tey hava ognað sær í arbeiðslívi ella á annan hátt, so tey kunnu fara undir førleikamenning / útbúgving.
Lagt verður upp til, at farast kann undir skipanina við førleikameting og førleikamenning á sumri í 2014. Til ber at lesa tilmælið á okkara heimasíðu.