Føroyski flaggdagurin er ikki farin nøkrum framvið í Nuuk. Á býarbussunum, uttanfyri almennar bygningar og garðinum hjá Hans Egedes Hus, har Sendistova Føroya í Reykjavík og Føroyingafelagið í Nuuk skipaðu fyri flaggdagshaldi, hevur Merkið veittrað í allan dag.
Afturat teimum mongu føroyingunum, ið eru búsitandi í Nuuk, luttóku somuleiðis grønlendskir tinglimir og meginparturin av nýggju grønlendsku stjórnini, til flaggdagshaldið í Nuuk. Herímillum landsstýrisformaðurin og starvssystrar landsstýriskvinnuna.
Frá vinstru: Múte Bourup Egede (fíggjarmál), Naaja H. Nathanielsen (vinnumál), Sirið Stenberg (uttanríkis- og vinnumál), Jens-Frederik Nielsen, (landsstýrisformaður), Vivian Motzfeldt (uttanríkismál), Nivi Olsen (útbúgving og mentan), Aqqaluaq B. Egede (undirstøðukervi).
Landsstýriskvinnan í uttanríkis- og vinnumálum flutti fram flaggdagsrøðu og legði dent á, hvussu Merkið varð viðurkent sum flagg føroyinga fyri júst 85 árum síðani, og at tað var eingin sjálvfylgja, at tað varð júst Merkið, við hvíta dúkinum, reyða krossinum og bláu rondini, ið bleiv flaggið, sum bretar viðurkendu sum tjóðarmerki føroyinga.
Harumframt sendi landsstýriskvinnan eina serliga heilsan til føroyingar í Grønlandi:
Øll røðan kann lesast her.