![Álendski mentamálaráðharrin á vitjan](https://landsstyri.cdn.fo/savn/11202/tony-asumaa-og-rigmor-dam.jpg?width=1024&height=576&rxy=0.55333333333333334,0.35576923076923078&rmode=crop&t=58217172&s=4tOOu_l_6M2pKtyyR2PwwzuXMEU)
Á middegi í dag kom álendski mentamálaráðharrin, Tony Asumaa, til landið.
Hann er komin á almenna vitjan hjá Rigmor Dam, landsstýriskvinnu í mentamálum, fyri at kunna seg um føroyska mentanarøkið.
Í dag hevur hann verið og vitjað Glasir og Kringvarpið, og Rigmor Dam hevur greitt honum frá føroyska mentanarøkinum í síni heild, umframt at hann hevur luttikið á einum fundi um føroysku UNESCO-luttøkuna.
Í morgin vitjar álendski mentamálaráðharrin í Norðurlandahúsinum, á Tjóðsavninum og á Fróðskaparsetrinum, har hann millum annað eisini skal hitta umboð fyri granskingarráðið. Seinnapartin í morgin fer hann á eina útferð, og mikumorgunin vitjar hann hjá ÍSF.
- Føroyar og Áland hava nógvar av teimum somu avbjóðingunum - men vit hava eisini nógvar av teimum somu møguleikunum, sigur Tony Asumaa og vísir á, at Áland eins og Føroyar hevur stórt sjálvræði.
Í Álandi kenna tey somuleiðis alt til trupulleikan av at missa ungfólk til onnur lond.
- Okkara ungu lesa víðari í Svøríki og Finnlandi, tí okkara útbúgvingarskipan gongur bara upp til bachelor. Tí er tað sera áhugavert fyri meg at síggja, hvussu nógv tit megna at skapa í Føroyum, bæði við hægri útbúgvingum og við møguleikunum til dømis á Glasi, sigur Tony Asumaa.
Hann heldur, at Føroyar eru eitt sera áhugavert undangonguland fyri smærri tjóðir sum Áland, tí møguleikarnir her - á øllum økjum - eru so sera stórir í mun til lága fólkatalið.
- Nógv av tí, sum eg síggi í Føroyum, eru loysnir, sum vit eisini hava tosað um í Álandi, men tað sær út til, at tit eru betri til at umseta hugskot til veruleika og skapa møguleikar fyri fólkið, sigur hann.
Tony Asumaa fer avstað aftur mikudagin.